महिला,तरुणी,अल्पवयीन मुलींवरील अत्याचार रोखण्यासाठी लवकरात लवकर ''शक्ती कायद्यास" तात्काळ चालना देण्याची गरज... ना.डॉ.नीलम गोऱ्हे
       पुणे/मुंबई दि.३०/१२/२०२० - पेण येथील अल्पवयीन मुलीवर बलात्कार करून हत्या तसेच विविध ॲप,सोशल मीडियाच्या तसेच वेबसाईट द्वारे संपर्कात येवून वाकड येथे तरुणीवर झालेल्या लैंगिक अत्याचार, याचबरोबर सिडको पोलिस ठाणे, संभाजीनगर येथे दाखल घटनेत नौकरीचे आमिष दाखवून तरुणीवर अत्याचाराची घटना अशा घटनांबाबत महाराष्ट्र विधानपरिषद उपसभापती ना.डॉ.नीलम गोऱ्हे यांनी गृहमंत्री अनिल देशमुख यांना निवेदन देऊन यातील आरोपींना अटक करून कडक कारवाई करण्याची सूचना केली आहे. (सदरील घटना दि.२७ ते २९ डिसेंबर, २०२० दरम्यान घडलेल्या आहेत. )

पेण,रायगड येथील बलात्काराच्या आरोपाखाली तुरुंगात शिक्षा भोगत असलेल्या आणि पॅरोलवर सुटलेल्या आरोपीने एका ३ वर्षीय आदिवासी मुलीवर बलात्कार केल्यानंतर तिची हत्या करण्यात केली आहे. सदरील घटना दि.२९ डिसेंबर, २०२० रोजी समोर आली असून यातील आरोपी अद्याप फरार आहे. आरोपीला त्वरित अटक करण्यात यावे असे निर्देश स्थानिक पोलिसांना ना.डॉ.गोऱ्हे यांनी दिले आहेत.

टिंडर ॲपच्याद्वारे ओळख करुन घेवून तरुणीवर केला अत्याचार

     वाकड पोलीस स्टेशन,पिंपरी चिंचवड,पुणेअंतर्गत टिंडर ॲपच्याद्वारे ओळख करुन घेवून तरुणीवर अत्याचार केल्याचे दुदैवी घटना नुकतीच निदर्शनास आली आहे. याबाबत वाकड पोलीस स्टेशन येथे एफआयआर क्र.०९१२/२०२० नुसार गुन्हा नोंद झाला आहे.यात तरुणीला तिच्या इच्छेच्या विरोधात दारू पाजून तिच्यावर बलात्कार केल्याचे तरुणीने एफआयआर मध्ये नमूद केले आहे. सदरील घटनेत आरोपीला अटक करण्यात आली असलीतरीदेखील आरोपीच्या कुटुंबाकडून त्याची मानसिक स्थिती ठीक नसल्याबाबत बोलून आरोपीला या घटनेतून सूट मिळण्यासाठी प्रयत्न करत असल्याचे काही सामाजिक संस्थांचे म्हणणे आहे. पिंपरी चिंचवड पोलिसांनी यात आरोपीला जामीन मिळणार नाही याची पूर्ण काळजी घेण्याचे निर्देश ना.डॉ.गोऱ्हे यांनी दिलेल्या पत्राच्या माध्यमा तून पोलीस विभागास दिले आहेत.

''मी तो नव्हेच "असे म्हणत पीडित मुलीसह कुटुंबावर दबाव

संभाजीनगर येथे एका पक्षाच्या कार्यकर्त्याने नौकरीचे आमिष दाखवून एका तरुणीवर अत्याचार केल्याची घटना मीडियाच्या माध्यमातून समोर आली आहे.यात आरोप हा ''मी तो नव्हेच " असे म्हणत असून पीडित मुलीवर आणि कुटुंबावर दबाव आणत आहे. यामुळे पूर्वीच्या केसेसप्रमाणे या केसमध्येदेखील पोलिसांकडून बी समरी रिपोर्ट होण्याची शक्यता नाकारता येत नाही. त्यामुळे या घटनेचा तपास वरिष्ठ महिला पोलीस अधिकारी यांच्याकडे सोपविण्यात यावा. तसेच संभाजीनगर (औरंगाबाद) येथील महिलांवरील अत्याचाराच्या बऱ्याच केसेसमध्ये बी समरी रिपोर्ट करून त्या केसेस बंद करण्यात आल्या आहेत. ज्या केसेस मध्ये बी समरी रिपोर्ट करून बंद केल्या आहेत या केसेसचा आढावा गृहराज्यमंत्री ग्रामीण शंभूराजे देसाई यांनी घेण्याच्या सूचना देण्यात यावी अशी मागणी ना.डॉ.गोऱ्हे यांनी सदरील पत्रात केली आहे.

अशा घटनांना प्रतिबंध करण्याच्या दृष्टीने सुधारणा करणे आवश्यक

       यापूर्वीही नवी मुबई पोलीस आयुक्त्तालया अंतर्गत मॅट्रीमोनीअल वेबसाईटचा वापर करुन अनेक तरुणींची शारिरीक व आर्थिक फसवणूक केल्याबाबत गुन्हा दाखल आहे. राज्यात या स्वरुपात घडत असलेल्या घटनांना प्रतिबंध करण्याच्या दृष्टीने सुधारणा करणे आवश्यक वाटत असल्याचे ना.डॉ.गोऱ्हे यांनी सांगितले असून यात...

● पेण, रायगड येथील अल्पवयीन मुलींच्या अत्याचाराच्या घटनेत आरोपी पॅरोलवर होता हे निष्पन्न झाले आहे.
बलात्काराच्या गुन्ह्यात अटकेत असलेल्या आरोपीला पॅरोलवर सोडण्यात येऊ नये अशी विनंती न्यायालयास गृहविभागाकडून करण्याची डॉ.गोऱ्हे यांनी सूचना केली आहे.

● महाराष्ट्र सरकारने प्रस्तावित केलेल्या 'शक्ती कायद्यात' सायबर गुन्ह्यात देखील आरोपीला कडक कारवाई होण्याबाबत तरतूद केली गेली असली तरी देखील शक्ती कायदा लवकरात लवकर अस्तित्वात येण्यासाठी गृहविभागाकडून तात्काळ कार्यवाही अपेक्षित आहे.काही सामाजिक संस्थांना शक्ती कायद्यात काही उपयोजना सुचवायच्या आहेत. याबाबत सूचना मागविण्यासाठी स्वतंत्र ई-मेल घडण्याची आपणास सूचना करत असून कायद्याबाबत गठीत विधिमंडळाची बैठक लवकर घेण्याची सूचना देखील डॉ.गोऱ्हे यांनी या माध्यमातून केली आहे.

● सर्व सोशल वेबसाईट वर लॉगीन करणाऱ्या सर्व व्यक्तीचे KYC च्या धर्तीवर त्याचे खात्याशी आधारकार्ड क्रमांक संलग्न करणे बंधनकारक करावे जेणेरुन गैरप्रकार /सायबर गुन्हे/अत्याचार करणाऱ्या आरोपीची सर्व माहिती तात्काळ उपलब्ध होईल.

● सध्या (कोविड-१९) या कोरोना विषाणूच्या पार्श्वभूमीवर विद्यार्थी मोठया प्रमाणावर ऑनलाईन शिक्षण घेत आहेत.किशोर वयापासून ऑनलाईन ॲप्‍लीकेशन वापरण्याचे प्रमाण वाढत आहे. त्यामुळे ऑनलाईन माध्यमाचा वापर करुन होणाऱ्या गुन्हयांची/ गैरवापराची संख्याही वाढत आहे.यासाठी सायबर क्राईममधील तज्ञ ,शैक्षणिक क्षेत्रातील तज्ञ यांच्या समन्वयाने विद्यार्थ्यांसाठी ऑनलाईन ॲप्लीकेशन वापर करताना कोणत्या प्रकारची काळजी घ्यावी ? कोणती माहिती/ फोटो शेअर करु नये, याबाबतच्या शैक्षणीक घटकांचा शालेय अभ्यासक्रमांत अंतर्भाव करण्याबाबतही कार्यवाही करणे योग्य होईल. उपरोक्त नुसार कार्यवाही करण्याबाबत सर्व संबंधितांना निर्देश व्हावेत अशी सूचना डॉ.गोऱ्हे यांनी गृहमंत्री ना.देशमुख यांना केली आहे.

ना.डॉ.नीलम गोऱ्हे यांनी गृहमंत्री अनिल देशमुख यांना आरोपींवर कडक कारवाई करण्याची केली सूचना
dr.neelam gorhe instructed home minister anil deshmukh to take strict action against accused
 
Top