पंढरपूर,२०/११/२०२० - कोरोनाच्या पार्श्वभूमीवर महाराष्ट्र राज्य विधी व न्याय विभागाच्यावतीने सर्व जिल्हाधिकारी आणि त्यांचे कार्यालय,पोलीस अधीक्षक जिल्हा पोलीस अधीक्षक कार्यालय यांना कार्तिक वारी पंढरपूर यात्रा 2020 च्या नियोजना बाबत कळविण्यात आले आहे. कार्तिक शुद्ध एकादशी ही अत्यंत महत्वपूर्ण एकादशी आहे. कार्तिकी यात्रेचा kartik yatra कालावधी कार्तिक शुद्ध एक ते कार्तिक शुद्ध १५ म्हणजेच दिनांक १६/११/२०२० ते दिनांक ३०/११/२०२० असा असणार आहे.

महसूल व वन विभाग मदत व पुनर्वसन महाराष्ट्र शासन यांचे आदेशानुसार राज्य शासनाने दिनांक १६ नोव्हेंबर २०२० पासून राज्यातील सर्व मंदिरे भाविकांना दर्शनासाठी खुले करून दिलेली आहेत. तसे आदेश पारित केलेले आहेत. कार्तिक शुद्ध एकादशी यात्रेच्या निमित्ताने महाराष्ट्रातील सर्व जिल्ह्यातून यावर्षीही दिंड्या पंढरपूर येथे दाखल होण्याची शक्यता आहे. कार्तिक एकादशी निमित्त देवस्थानात करावयाचे नित्योपचार सीमित मान्यवरांच्या उपस्थितीत व कोरोना विषाणूचा प्रादुर्भाव रोखण्याच्या दृष्टीने सामाजिक अंतर राखून करण्यासंदर्भात सर्व मार्गदर्शक सूचना (sop) चे काटेकोर पालन करून होणार आहेत. त्यामुळे कोरोना विषाणूंचा प्रादुर्भाव रोखण्यासाठी प्रत्येक जिल्ह्यातून निघणार्‍या दिंड्या पंढरपूर येथे दाखल होणार नाही, याची खबरदारी घेण्यात यावी असे आदेश शासनाने काढले आहेत.
 
Top