आ.परिचारक यांची राज्य सरकारवरील टिका म्हणजे वेड पांघरून पेडगावला जाण्याचा प्रकार - शिवसेना जिल्हा प्रमुख संभाजी शिंदे

पंढरपूर -विधानपरिषदेचे भाजपा समर्थक आमदार प्रशांत परिचारक यांनी नुकतेच पंढरपूरात महाविकास आघाडीच्या विरोधात आपल्या दारा समोर उभारुन आंदोलन केले आहे.राज्य सरकार वर टिका केली आहे.हा प्रकार म्हणजे वेड पांघरुन पेडगावला जाण्याचा प्रकार आहे अशी टिका शिवसेनेचे पंढरपूर विभाग जिल्हा प्रमुख संभाजी शिंदे यांनी प्रसिध्दीस दिलेल्या पत्रकाद्वारे केली आहे.

  एकीकडे केंद्र सरकार राज्य शासनाच्या वाट्याचे विविध करापोटी संकलित झालेले हजारो कोटी रुपये अडकवून ठेवत आहे.कोरोनाचा सामना करण्यासाठी राज्यांना देण्यात येणार्‍या अर्थिक पॅकेजमध्ये महाराष्ट्राबाबत भेदभाव करीत आहे. त्याच वेळी राज्यातील भाजपा समर्थक नेते मंडळी मुख्यमंत्री निधीस मदत करण्याचे आवाहन करण्या ऐवजी पीएम.केअर्स फंडास मदत करा असे आवाहन करुन या संकटकाळातही राजकारण करीत आहेत.असे असताना आता महाराष्ट्र बचाव आंदोलनाच्या माध्यमातून भाजपाने हसू करुन घेतले असून आ.परिचारक यांनी त्यांच्या आंदोलानाबाबत जनतेत काय प्रतिक्रिया आहेत याचा कानोसा घेतला तर ते पुन्हा अशा प्रकारच्या आंदोलनाच्या भानगडीत देखील पडणार नाहीत अशी प्रतिक्रिया संभाजी शिंदे यांनी दिली आहे .

        केंद्र सरकारने कोरोनाचा देशभरात फैलाव रोखण्यासाठी वेळीच उपायोजना केली असती तर आज देशात गोरगरीब लोकांचे हाल झाले नसते हे सुर्यप्रकाशाइतके सत्य आहे.लॉकडाऊन जाहीर झाल्यापासून हजारो किलोमीटरची पायपीट करीत लाखो कामगार घराकडे परतत होते तेव्हा त्यांना दिलासा देण्यास केंद्र सरकार अपयशी ठरले होते. मार्च महिन्यात केंद्रीय अर्थमंत्री निर्मला सितारामन यांनी १ लाख ८० हजार कोटी रुपयांच्या पॅकेजची घोषणा केली पण त्यातील दमडीही सर्वसामान्य जनतेपर्यंत पोहोचली नाही.राज्यातील शेतकरी तयार शेतीमाल घरात पडून असल्याने मोठया संकटात सापडला अशा संकटकाळात केंद्राने हमी भाव खरेदीचा विस्तार करणे गरजेचे असताना यात केंद्र शासन अपयशी ठरले.मुंबई हे जगातील ३ क्रमांकाचे अर्थिक केंद्र आणि २ कोटीहून अधिक लोकसंख्येचे शहर आहे.या शहरातून लाखो कोटी रुपयांचे उत्पन्न केंद्र सरकारला प्राप्त होते पण मुंबईसाठी ठोस अर्थिक मदत देण्यास केंद्राने हात आखडता घेतला.राज्यातील शेतकर्‍यां सह दुग्धव्यवसायीक,इतर छोटे मोठे स्वयंरोजगार करणारे व्यवसायीक आदींना थेट अर्थिक मदत करण्याची गरज असताना महाराष्ट्रावर अन्याय करण्यात आला. याबाबत आ.परिचारक हे चकार शब्द काढण्यास तयार नाहीत.आ.परिचारक यांनी राज्य शासनाच्या कर्जमाफीचा लाभ शेतकर्‍यांना मिळाला नाही अशी टिका करीत आहेत.त्यांनी एकदा भाजपा सरकारच्या काळात करण्यात आलेल्या फसव्या कर्जमाफीचा आढावा घ्यावा आणि शेतकर्‍यांच्या प्रतिक्रियाही जाणून घेतल्या तर त्यांचा भ्रम दूर होईल.कोरोनामुळे संकटात सापडलेल्या शेतकर्‍यांना नव्याने कर्ज देण्यासाठी स्वतः राज्य शासनाने हमी देण्याचा निर्णय घेतला आहे व तशा सुचना बँकाना देण्यात आल्या आहेत. तर शेतकर्‍यांना बांधावरच बियाणांसह इतर आवश्यक बाबींचा पुरवठा व्हावा यासाठी ठोस उपायोजना केल्या आहेत.राज्यासह पंढरपूरातही हजारो परप्रांतिय कामगार अडकून पडल्यामुळे वास्तव्यास होते त्यांच्या प्रवासखर्चासह सर्व व्यवस्था राज्य शासनाने केली तर पंढरपूरातील जवळपास एक हजार मजुरांना तामीळनाडूकडे रेल्वेद्वारे पाठविण्यासाठी स्वत: मुख्यमंत्री उध्दव ठाकरे यांनी लक्ष घातले होते.

  राज्यातील सामान्य जनतेला वैद्यकिय उपचाराचा भुर्दंड सहन करावा लागू नये म्हणून महात्मा फुले जनआरोग्य योजनेचा विस्तार करुन राज्यातील सर्वच केशरी कार्डधारकांचा आता यात समावेश करण्यात आला आहे.त्याच बरोबर सर्वसामान्य छोट्या व्यवसायीकांसाठी राज्यशासन ठोस उपाय योजना करीत असून संकटकाळात केवळ राजकारण म्हणुन विरोध आंदोलन करुन महाराष्ट्र बचावाच्या नावाखाली भाजपासमर्थक चमकोगीरी करीत आहेत.महाराष्ट्राची लोकसंख्या आणि मुंबई महानगराची आंतराष्ट्रीय कनेक्टिव्हीटी याचा विचार केला तर कोरोनाचा प्रसार राज्यात कशा प्रकारे झाला याचे संदर्भ विरोधकांच्या लक्षात येतील.सर्वांना सोबत घेवून चालणारे हे महाविकास आघाडीचे सरकार असून कोरोनामुळे महाराष्ट्रच काय तर सार्‍या जगावर संकट घोंगावत असताना भाजपा व त्यांच्या समर्थकांनी केलेले आंदोलन म्हणजे किळसवाण्या राजकारणाचा प्रकार आहे अशी जहरी टिका शिवसेनेचे पंढरपूर विभाग जिल्हा प्रमुख संभाजी शिंदे यांनी केली आहे.
 
Top