शिवसेनेचा पाठिंबा मिळाल्याशिवाय भाजप सत्ता स्थापनेचा दावा राज्यपालांकडे करणार नाही, असे भाजप नेत्यांच्या बैठकीत ठरले असून ज्यात देवेंद्र फडणवीस यांच्या नेतृत्वाखाली भाजप-शिवसेना महायुतीचे सरकार स्थापन होईल, शिवसेनेसोबत चर्चेचे दरवाजे खुले आहेत. लवकरच याबाबत निर्णय होईल, असा विश्वास भाजपचे प्रदेशाध्यक्ष चंद्रकांत पाटील यांनी मंगळवारी व्यक्त केला.  

शिवसेना मुख्यमंत्रिपदावर अडल्याने मुख्यमंत्री फडणवीस यांनी मंगळवारी वर्षा बंगल्यावर बोलवलेल्या भाजपच्या वरिष्ठ नेत्यांची बैठकीस प्रदेशाध्यक्ष चंद्रकांत पाटील, सुधीर मुनगंटीवार, विनोद तावडे, रावसाहेब दानवे, पंकजा मुंडे हे नेते उपस्थित होते. या बैठकीनंतर पत्रकारांशी बोलताना प्रदेशाध्यक्ष पाटील म्हणाले, 'शिवसेनेकडून आम्हाला अजून कोणताही प्रस्ताव आलेला नाही, आम्ही वाट बघत आहोत.' 

'राज्यात देवेंद्र फडणवीस यांच्या नेतृत्वाखाली सरकार स्थापन होईल. शिवसेनेसोबत चर्चा करण्यासाठी आमचे दरवाजे उघडे आहेत. चर्चा होईल आणि मार्ग लवकरच निघेल. शिवसेनेशी चर्चा होईल आणि लवकरच गोड बातमी आपल्याला मिळेल', अशी आशा अर्थमंत्री सुधीर मुनगंटीवार यांनी व्यक्त केली. 

राज्यातील सत्ता स्थापनेबाबत केंद्रीय मंत्री नितीन गडकरी हे मध्यस्थी करणार आहेत. गडकरी आज, बुधवारी मुंबईत येत असून ते शिवसेनेचे पक्षप्रमुख उद्धव ठाकरे यांची भेट घेऊन चर्चा करणार आहेत. 

त्यानंतर , भाजप नेते विनोद तावडे यांनी राज्यपालांची भेट घेवून भाजपची सत्ता स्थापने बाबतच्या भूमिकेची माहिती राज्यपालांना दिली. 

 
Top